Kicuah Jarak Jauah

Kalau salamo ko ado istilah sambuangan lansuang jarak jauah, namun Kari Garejoh kini punyo istilah kicuah jarak jauah. Urang-urang nan manjadi tukang kicuah indak paralu baadok-adok an jo urang nan ka inyo kicuah. Malah, kicuah jarak jauah ko labiah babayo dari kicuah jarak dakek.

Kalau kicuah jarak dakek bisa dicaliak aia muko si tukang kicuah dan bisa ditandoi. Tapi kicuah jarak jauah nan tadanga hanyolah suaro. Indak tau baa bana bantuaknyo dan apo se ciri-cirinyo.


“Jadianlah iko palajaran paliang baharago Din,” kato Kari ka Udin Kuriak nan duduak basabalahan.

“Apo tu?” Tanyo Udin.

“Ijan sumbarang picayo se ka urang manalepon atau ma-es-em-es nan mangatoan urang gaek atau kaluarga awak kacalakaan atau di kantua polisi. Ujuang-ujuang dari nan manalepon tu cuma mintak pitih. Iko mah contohnyo, dikatoan urang gaeknyo sakik, sudah tu dimintaknyo pitih, lah picayo se. Kasudahannyo kanai sambilan juta labiah,” jawek Kari sambia mampacaliak-an barita di koran ‘Singgalang’ nan bajudul ‘Penipuan dengan Modus Orangtua Kecelakaan, Rp9,2 Juta Amblas’.

Dalam barita nan dibaco Kari tu, dijalehan anak nan kanai kicuah tu ditalepon dek urang indak dikatahui sia namonyo. Urang tu maagiah kaba baraso urang gaek anak ko dapek kacalakaan dan dirawat di rumah sakik di Padang. Sudah tu, urang nan manalepon mamintak kirimkan pitih untuak biaya ubek sambia maagiahan nomor rekening. Dek anak sayang ka urang tuo-lah namonyo tantu dituruik-an sajo pamintaan si panelepon, tanpa maanalisa dan tanpa manalepon dulu ka urangtuonyo.

“Babagai caro dek urang mancari pitih kini. Caro mangicuah juo banyak,” apo nan dikatoan Kari ditanggapi dek Mak Pono.

“Iyo Mak. Ado pulo kajadian manimpo mintuo den bulan nan lapeh. Urang tu manalepon mangatoan adiak bini den dapek kacalakaan dan inyo mintak pitih biaya ubek. Cuma sajo dek lai ditanyo, tanyato urang nan dikatoan kacalakaan tu sadang di rumah,” Uwo Pulin mancaritoan pangalamannyo.

“Mustinyo kalau awak manarimo talepon bantuak itu harus ditanyo dulu. Saandainyo nan dikatoannyo kacalakaan atau sadang di kantua polisi, ditanyoan baliak ka nan manalepon tu siapo namo nan kacalakaan tu. Sudah tu hubuangi talepon urang nan dikatoan dapek musibah tu. Inyo pasti indak tau sia namo urang gaek atau kaluarga awak doh. Jadi, jan capek-capek picayo jo urang nan manalepon,” kecek Tan Baro.

“Tapi kadang-kadang nan manarimo talepon sarupo itu ilang akanyo, indak tantu nan ka dikatoan lai. Sia nan indak panik manarimo talepon mangatoan urang gaek awak sakik atau kacalakaan? Sia nan indak ka panik manarimo talepon mangatoan urang-urang nan awak sayang dapek musibah. Jadi, indak tantu nan ka disabuik lai,” salo Kari.

“Makonyo, katiko dapek talepon tu kandalikan diri. Karano memang lah taktik tukang kicuah jarak jauah tu manembak mental awak dulu, baru inyo malakukan aksinyo,” baleh Tan Baro.
(eSPe St.Soeleman)

source: Harian singgalang sabtu, 26 maret 2011

Posted in: sehari-hari